Exposición de pintura de Loli Calvelo «Al óleo sobre Lienzo»

EXPOSICIÓN «Al óleo sobre Lienzo»

O Concello acolle, do 10 ao 14 de agosto, no Salón de Plenos da Casa Consistorial, a exposición de pintura «Al óleo sobre Lienzo» da artista canicense Loli Calvelo que  conta cunha sólida traxectoria artística, froito dunha dedicación constante á pintura durante varias décadas.

Desde finais dos anos oitenta desenvolveu unha intensa actividade expositiva, participando en diversas mostras individuais e colectivas en distintos espazos culturais de Galicia, onde deu a coñecer unha obra marcada polo rigor técnico, a sensibilidade artística e unha fonda paixón pola creación pictórica.

O seu traballo desenvólvese principalmente ao óleo sobre lenzo e caracterízase por un estilo de inspiración realista, no que destacan a coidada composición, a riqueza cromática e o tratamento da luz. Nas súas obras predominan as paisaxes, as flores, os bodegóns e outros motivos da natureza, representados cunha mirada serena e cunha especial atención ao detalle, convertendo cada cadro nunha expresión de equilibrio, harmonía e beleza.

A súa pintura constitúe unha expresión de sensibilidade, constancia e compromiso coa arte, valores que se reflicten en cada unha das súas creacións.

Con esta exposición, o Concello da Caniza ofrece á veciñanza e ás persoas visitantes a oportunidade de coñecer de preto a obra dunha artista que fixo da pintura unha forma de expresión persoal e un medio para transmitir a beleza da natureza e da contorna que a inspira.

A mostra permanecerá aberta ao público do 10 ao 14 de agosto, en horario de 8 a 15h no Salón de Plenos da Casa do Concello.

Mostra incluída na programación do Verán de Lecer 2026.