O Entroido de Verán da Caniza 2026 converteuse este sábado 25 de xullo nun rotundo éxito de participación, organización e ambiente, reunindo a centos de persoas nunha xornada festiva que encheu as rúas da vila de música, cor, creatividade e convivencia.
Organizado polo Club Balonmán Caniza en colaboración co Concello da Caniza e co apoio do comercio local, da hostalaría, dos patrocinadores e dun amplo equipo de persoas voluntarias, o evento reafirmou o seu papel como unha das citas festivas máis divertidas, converténdose ademais nun importante revulsivo para a economía local.
Unha xornada chea de actividades
A programación arrancou a primeiras horas da mañá, coa apertura da zona infantil instalada na Praza Maior, na que os pequenos gozaron dos inchables, pintacaras, obradoiros e da batucada participativa. A sesión vermú, amenizada pola Charanga SDK, levou a música polas rúas da vila.
Outro dos momentos máis emotivos foi o pregón pronunciado polos canicenses Brais e Junior, integrantes do equipo Terra Xamón, que recibiron unha calorosa ovación do público como recoñecemento á súa recente participación no UNIRAID 2026, unha aventura solidaria na que percorreron preto de 3.000 quilómetros por Marrocos, repartindo material entre comunidades desfavorecidas.
O desfile e concurso de disfraces volveu converterse no gran protagonista da tarde. Ademais das 18 comparsas e grupos inscritos no certame, foron moitos os veciños e visitantes que decidiron disfrazarse e participar sen competir, ofrecendo unha imaxe espectacular das rúas da Caniza.
As comparsas participantes no concurso foron:
- O Pendello de Bad Bunny
- Red Velvet
- Tribu Xesteira
- Dous nunha moto
- Intuyes
- Las Tóxicas
- SuperMarioBross
- Zumba-Dos
- París 1950
- La Neverita
- A última tribu e cheghamos tarde
- Los máis salaos!
- As Chicholinas de Guláns
- Chapuzón hacia los 60
- Charanga Desordenada
- Os Incribles
- Nueva Curva
- Os Vixiantes do Entroido
A calidade, orixinalidade e elaboración das propostas fixeron especialmente difícil o labor do xurado, que finalmente acordou conceder os seguintes premios:
Mellor Comparsa
Nueva Curva — 700 €
Comparsa Máis Ruidosa
O Pendello de Bad Bunny — 300 €
Comparsa Máis Bailonga
Intuyes — 200 €
Comparsa Máis Currada
Tribu Xesteira — 150 €
Comparsa Máis Orixinal
As Chicholinas de Guláns — 100 €
Comparsa Máis Divertida
Dous nunha moto — 50 € máis unha cesta
Comparsa Máis Veraniega
Os Vixiantes do Entroido — Abono dobre no BM Caniza
O Alcalde Luis Piña, acompañado do presidente do Club Balonmán Caniza, Marcos Estévez, do concelleiro Miguel Anxo Gómez e de Montse Pérez da directiva do CBC, entregaron os premios ás comparsas gañadoras.
O Concello financiou integramente os 1.500 euros destinados aos premios, entregados en forma de vales de compra para consumir no comercio local, reforzando así o seu compromiso coa dinamización económica e co apoio ao pequeno comercio.
A festa continuou ata ben entrada a madrugada coa actuación dos DJs Samu Pexe, Iván Alonso, Khris Guez, Diego Mei, Joy Rúa, Gustavo Álvarez e Tibú, que puxeron o broche final a outra exitosa edición deste entroido.
Na súa intervención o Alcalde destacou a extraordinaria implicación de todas as persoas e entidades que fixeron posible o éxito do evento.
"Quero expresar o meu máis sincero agradecemento ao Club Balonmán Caniza, á súa directiva e a toda a gran familia que hai detrás desta organización. Levan meses traballando con enorme ilusión, dedicación e de maneira totalmente desinteresada para que hoxe a Caniza volvese vivir unha festa exemplar. O seu compromiso merece o recoñecemento de toda a veciñanza."
"Grazas tamén ao comercio local, á nosa hostalaría, aos patrocinadores, ás persoas voluntarias, aos servizos municipais e a todas as persoas que colaboraron nesta xornada de sábado."
Noraboa a todos!
Galería multimedia
