Charla informativa sobre o «Plan Hidrolóxico Miño-Sil 2028-2033», de interese para as Comunidades de Traídas de Augas

O vindeiro venres, 27 de febreiro, ás 20:00 horas, o Salón de Plenos da Casa Consistorial da Cañiza (Rúa Oriente, 11 – 2º andar) acollerá unha charla informativa centrada no Plan Hidrolóxico Miño-Sil 2028-2033, con especial atención ao abastecemento a poboacións.

A xornada está dirixida principalmente ás Comunidades de Usuarios de Traídas de Auga, mais será tamén de portas abertas para toda a veciñanza interesada en coñecer de primeira man os aspectos clave da planificación hidrolóxica e da xestión dos recursos hídricos no municipio.

Baixo o título “Plan Hidrolóxico Miño-Sil 2028-2033. Temas importantes: o abastecemento a poboacións”, a sesión será impartida por técnicos da Confederación Hidrográfica do Miño-Sil (CHMS), quen abordarán cuestións de especial relevancia para o presente e o futuro do subministro de auga no Concello.

Participarán como relatores:

• Agustín Sevilla Briceño, Xefe de Área de Plans e Estudos da CHMS.
• Carlos Guillermo Ruiz del Portal Florido, Xefe da Oficina de Planificación Hidrolóxica da CHMS.
• A charla estará moderada polo Alcalde da Cañiza, Luis Antonio Gómez Piña.

O Alcalde destacou a importancia desta xornada para garantir unha correcta xestión dos recursos hídricos e reforzar a coordinación coas comunidades de usuarios, fundamentais no noso sistema de abastecemento local.

Trátase dunha sesión informativa de portas abertas, polo que poderán asistir todas as persoas interesadas.